Qiyinchilikda lazzat bor

Orifjonova Muxlisaxon Alisher qizi
0
Ovoz berilmagan

Kutubxonada tadbir bo'ladigan bo'ldi. Men boshlovchiman, ertaroq borib, tashkiliy ishlarga ko'maklashay dedim. Hamma u yoqdan bu yoqqa yugurar, barcha kecha bajarilmay, shu kunga qolgan ishlarni bajarishga bel bog'lagandek edi. Shu payt ro'paramda qayerdandir bir qiz paydo bo'ldi-yu, men va yana boshqalar bilan ham eski qadrdonlardek salomlashdi. Xijolat tortdim,xuddi eski tanishim-u eslolmayotgandek. Keyin shuni bildimki, u o'zi tanlagan soha bo'yicha chet elda, mashhur universitetlardan birida tahsil olayotgan ekan. Uning yonib turgan ko'zlari, har bir so'zida namoyon bo'layotgan yangicha nafas,madaniyat bilan muomala qilishi,  odobi xotiramda muhrlanib qoldi.
 O'shanda u "Qiyinchilikda lazzat bor ", degandi...
 Bolaligimda,ayniqsa, maktab paytim juda intiluvchan qiz edim. Qishloqda rus tili, ingliz tili o'qituvchisi yetishmasdi, bilmadim, nega. Lekin bizda bu fanlar o'tilmay qolmasdi yoki musiqa yoki tasviriy san'at o'qituvchimiz bizga chet tilidan o'zlari bilgancha ta'lim berishardi. Ingliz tilini hozirgacha o'rganaman, biroq rus tili men bilan inoq emas. Achinarlisi, bu bir mening emas,ko'plab do'stlarimda ham muammo. 
 Kollej, u yerda o'qish men uchun biroz antiqa edi. Bizga dars o'tadigan ustozlar o'tadigan fanini yo o'zi yaxshi o'zlashtirmagan yo bilimini qizg'onadi, yoki semestr so'nggida rizqidan mahrum bo'lgisi kelmaydi. O'qishda eng ko'p halol baho olaman,deb xom xayol qilganlar qiynalarkan!
Universitetda qaysidir darsda nimadandir munozara chiqdi. Mavzu borib-borib korrupsiyaga to'xtadi. Shunda bir kursdoshim tish-tirnog'i bilan bu illatni qoraladi. Shunda o'qituvchimiz "Bilim deganga bilim,pul deganga pul berib,ishni bitirish kerak",degan mazmun bilan fikrini tugatdi. Aytilganlarni yana ham umumlashtirsam, korrupsiya bu-yaxshilikka yaxshilik qaytarish ekan... 
 Yuqorida tilga olganim, rivojlangan mamlakatlarning birida ta'lim olayotgan yurtdoshim o'qishni bitirib shu yerdagi kichik bir firmaga ishga joylashmoqchi bo'libdi. Bu sodda qiz har qancha bilimli bo'lmasin, aqlli va tashabbuskor bo'lmasin, ishga kirolmabdi! Bilasizmi nega, bunaqa insonlar pul bilan ishga joylashishni o'zlariga ep ko'rmaydi! Eh, shuncha o'qibsiz, bilimingizni shu Vatan uchun, uning taraqqiyoti uchun sarflamaysizmi? Qanaqa xudbin insonsiz? 
 Bilishimcha, u hozirda dunyo tan olgan kompaniyalardan birida iqtisodchi sifatida ishlayotganmish... 
Biz "aqllilarning ko'chib ketishi" uchun shunday zamin tayyorladikki... 
Qulog'im ostida shu gap aylanaveradi: "Qiyinchilikda lazzat bor". Ha, men shu kundan adolatsizlikka qarshi kurashishni qiyinchilik deb atayman! Bu kabi muammolarni hal qilish barchamiz uchun muhim emasmi? Siz qanday yechimni taklif qilasiz, yoki barchasining davosi vaqtmi?

Izohlar

Zuhriddin.Abdullayev19990920@gimail.ru's picture
0

Zur